有啲家長嘅旅行模式真係有問題。
啱啱整理緊喺日本影嘅櫻花相，諗起一件事。四月頭喺大阪，同朋友廢行心齋橋行到快半夜十二點（香港時間11pm），其實得番一兩間店舖未閂。入咗一間賣衫嘅，音樂播到大大聲，只有三個客人，聽到佢哋廣東話夾雜英文嘅對話，知道係香港人。
過咗陣我拎件衫去照鏡，竟然，喺牆邊塊鏡隔離，見到架bb車，手柄掛住一袋二袋，入面有個兩三歲左右嘅細路仔坐咗喺度瞓覺，冇遮冇掩。我已經嚇親，唔係啩，呢個鐘數喎？遊客嘅bb車？仲要間舖好光，啲音樂好嘈喎。
然後有個女人一路照鏡一路同隔離個女仔講：「你睇下，瞓著咗喇。」「咁易瞓著嘅佢？」「係呀，次次都係咁，由佢自己就瞓著㗎喇！唔使理，幾舒服。」
我再心諗，下？乜原來行街買衫重要過你個仔嘅健康？佢喺bb車瞓覺，你係行得好舒服，咁佢呢，有冇諗過佢舒唔舒服？半夜十二點，佢點都應該更舒服咁平躺喺床度，靜靜地覺覺豬，而唔係喺街坐住瞓再畀音樂轟炸啩。
首先我自己唔太贊同帶年紀太細的小朋友去旅行，除非你節奏緩慢：唔會chur景點chur影相chur shopping，又或者係長期旅行中。如果唔係細路又攰大人又攰，真係冇乜必要。一來bb仔要有充足休息，二來佢哋咁細個，大個咗都唔記得。等佢哋大個啲再一齊去，可以同佢哋分享更多呢個世界嘅嘢，印象又深啲。
如果因為好想同小朋友留下回憶，或者想去旅行但bb又冇人照顧等等而帶b去旅行，其實都明白嘅。但，帶住個咁細嘅小朋友，你嘅行程係咪應該稍為adjust 下呢？早啲行完早啲返酒店休息，至少唔好搞到佢半夜三更、瞓覺時間都仲要陪你躝街丫。我相信愛錫子女嘅父母都一定會為佢哋設想，尤其當佢仲咁細個。有小朋友就唔可以淨係滿足自己。
見住個阿媽半夜放個仔埋一邊，興高采烈咁揀衫，好不解。
離開後，喺Starbucks書店坐咗陣，我哋慢慢行到去拉麵店聚集嘅位置。凌晨兩點，我同朋友討論緊食邊間，突然又見到一家大細浩浩蕩蕩經過，又係講廣東話，又係有bb車，仲有個啜住奶嘴嘅小妹妹慢慢跟喺最後面，眼睛大大，同我對望。
唉，算吧啦。
photo: Two Japanese families in Dojoji, Wakayama. (Mar,2016)
ig: kachit_
Search